2 Corinthians 3

Pauroofa Koorinti máqannaasara narí papiqa ákarara foora máriafanoo.

(Óoqai Pauroona áukuana Yísuna ufara súqimaru fasiqafa mootínai suqímarunnai fírarinoo fufaqá misá ákara ruúmbeeqee ámufanoo mara máree moo átinai suqímarusunnai óonuree múnu nímufaqa misá qáfeeqa miná maréeqa nári suqímarunaki quqásoofanoo máridanoo misá faqa Yísuna ufara suqímariqau. Akaqáusa únna amaana ufa qímarusa náriqa kai únnaqira pása ákara rúmammaree moo átinai fíqa mi-pasánannai fífau nárana máaqa ueeqásee máraqau. Pauroofa minára iriséenoo Koorinti máqannaasa maaqí qímasee qímanniminau.)

1Maasá sía qeeqá qimooqídaqa ánoona ufá kai qímannimidaqa. Maasá ínnee ínannai fíqa sía akaqáusa naanna réeqa moóna ákara mara máree ínni múnu uqannífiqasee ínni faqa suqúanaura. Maasá ínni maqúsaindari moosáa fíqa sía ínniara pása ákara rúmaqimifaqa máree fuanáuree qianáura. 2Ínnee Koorinti máqannaasa maasá ákarara foora sía papiqasáa ákara rinoo maasá qímuqusasaa ákara ríara foora íqa máriafanoo, aiqámausa ásaana rúmasee íriaqeera ákara rínau akooqóo máridanoo. 3Ásauku mundírafa narí úqanna mi-pasána ákara ruúmbeeqee maasá qísaukuki quqásaifaqa ínni nímiqa. Sía Mooseefa máru kamuqoo íu̱ndée kai ídaqa sía kirifinnái óonisaa ákara rínoo máridanoo. Káqi márira Ánutufa narí maraqunannai faiqí faiqi maasá qímuqusasaa ákara rínoo máridanoo. 4Maasá írirafa ásauku mundíranasaaqari Ánutunasaa mundínoo márinara mi-ufána qíqa.

Pauroofa maasára faqa Ánutunara faqa moodáanakikira ufara qídanoo.

5Sía maasáki moó afeeka márifaqa maasá maa-saikána amaná máridaqa, maasá áfeeka Ánutufinnaindari kai qumurée maasá uqéeraidanoo. 6Mifá mi-ainainirána amanaikírana qímifaqa kai narí fúka moodáanaki kira ufa mi-saikánaki máridaqa. Miná fúka moodáanaki kira ufa sía nímaarusira ufa ákara ríranasaa mundínoo máridanoo. Ánutuna náaquqara andeeqara maraquna faiqí naunduráki márina minásaa mundínoo máridanoo. Mooseena sándufa ákararufa mifá kúqirana kai nímidanoo, Ánutuna maraquna fannoo káqi marirana nímidanoo.

7Óoqai Ánutufa Sinái áaqanasaa narí sándufa Mooseena qímamidanoo qaara ooni marasée minásaa ákara rúmaminau. Ákara rúmamidanoo narí Ánutuna káaqa aréenarana kooroomámbufanoo Mooseena óori afiri faqa káaqa qámafufaqa Isaraee máqannaasa miná óori qáfoofanoo nífu dároo dáraa ufaqa rufíaqau. Márinoo Mooseena óoriki káaqa qarafa kásooqaqee taikámaree múqufi taikánau. Óoqai Mooseena sándufa faiqí kúqirana nímimarifa káaqa aréenaranakina aní ufa márufanoo maqee kámu Ánutuna náaquqara andeeqara maraquna fannoo káqi márirana nímimarifa miná káaqa aréenarafa firaaqóo úriqararafa máridanoo. 9Nárira ufa ámeemaanai quqéemariafa firaa kaaqa areenaranakí aní ufa márinanoo Ánutuna andeeqáranaki quqée marífa miná káaqa aréenarana amana kai fee máriannoo fee sía amana kai firaaqóo úriqaranoo máridanoo. 10Maqee maasá Mooseena sándufara maaqí qídaqa. Maqee maría káaqa áreenara áinaina fannoo firaaqóo dároo dáraa ídanoo dóo náuraa areenarana rafáaqafusaifanoo dóo mifá áiqareenoo. 11Mooseena sándufa qúsasaa máru ainainafa miná áreenarafa firaafá márinanoo náaru náaru marira ainaina aréenarafa firaaqóo úriqaranoo máridanoo.

12Maasá mi-naaru mariráfa ánianinnanara asasamándee áfeesidaqa paasóosamándee Yísuna ufa qímannimidaqa. Maasá sía Mooseena aanna réeqa qamunna qummáree níkiaqasaa afisúsee óorisaa aréenarana rafáaqafidaqa. Mooseefa qamunna qumáreenoo Isaraee máqannaara narí óoriki tákukandáa rímarina miná taikée marína qáfeefoo qímasee qamunna óori afisínau.

14Mi-aukuanná Isaraee máqannaa írirafa dóo ititánoo márufaqa sía Ánutuna ufa óosana íriqau. Mi-kamúqooqari áni áni ufaqa maqee kámuqoo káqi mi-qamunnáfara foora misá írirafa ititánoo márifaqa óoqeenáa moodaanaki kira ufa ásaana rídaqa sía miná óosana íridaqa. Faiqí ásauku mundíranasaa atooqáfinanoo kai miqóo kai mi-qamunnána fooqáana rafáqaa íannoo. 15Isaraee máqannaa dóo maqee kái Mooseena sándufa ásaana ruafanoo mi-qamunnáfa kai misá írirana ititánnimaqaidanoo. 16Mi-qamunnána rafáqaairafa tamummáqara fasiqa ufamáu kai kambíqaidanoo. (Óoqai Mooseefa Isaraee máqannaasa Isipa máqusaindari nífiqamaree Sinai áaqana ámeemaanai óonureenoo Ánutuna úiqaana maqa usakánau. Mooseefa mi-uiqaana maqána usakánau. Mooseefa mi-uiqaana maqánaki kéeqafinoo Ánutuna faqa ufa qí qíufanoo rafúdamáfufanoo maqúsai faiqí ánaasee máruqoo misá faqa ufa qírara ufannóo óoriki qáfoofanoo óori tákukándaari marínau. Ufa takáseenoo káqinni fufanóo óoriki tákukandáarirafa íreeda kai rukéemarinau. Faiqí ánaasee miná rukárana qáfee foo qímasee qamunna óori akuámaqee marínau. Kaifáa úiqaana maqaki Ánutuna faqa ufa qírara kéeqafinoo rafáqaa ímarinau.) Mi-tamummaqara fasiqáfa minára maaqí qinau.

Mooseefa káqinni márufanoo qamunna óori rafáaqafinoo márinau. Ánutuna úiqaana maqaki kéeqeenoo karaambáiqa innai óori ubeekéenoo mi-qamunnána rafáqaa inau.
17Ákara fannoo karaambáiqara qídanoo Ánutuna maraqunara karaambáiqee qídanoo. Karaambáiqa maraquna máriqoo sía ititárafa máridanoo idukírafa máridanoo. 18Dóo maasá aiqámausa dóorisaa qamunna rafáqaa írausara foora máridaqa karaambáiqa káaqa qáreenarafa ínnisaimbaqa dóorisaara foora káaqa qámeeqeenoo aiqámai dároo dáraa ídanoo. Ínnisaimbaqa miqímammaree fídaqa Ánutuna maraquna fannoo ínnisaimbaqa karaambáiqa fooqáanaikamma qímaqánoo fídanoo fímarifanoo ínnisaimbaqa aréenarafa firaanáikinoo fídanoo. Karaambáiqa Ánutuna maraquna saika máridanoo.